nefi - edirne kasidesi

DER MEDH-İ SULTÂN AHMED HÂN (aleyhirrahmetüvelgufrân)

Edrine şehri mi bu yâ gülşen-i mevâ mıdır Anda kasr-ı pâdişâhî cennet-i alâ mıdır
Beyt-i mamûr-ı felek mi ol fezâda ol sarây Yâ zemîni cennet olmuş Kabe-i ulyâ mıdır
Cûylar mı devr eden tarf-ı çemenzârın yahud Mâî pervâz ile nat olmuş yeşil hârâ mıdır
Sebz ü hurrem bir fezâ mı her kenâr-ı cûybâr Yâ miyân-ı cûda aks-i künbed-i hadrâ mıdır
Hıfz için yâhut vücûd-ı pâdişâhı cûylar Pâsbân-ı genc-i devlet olmuş ejderhâ mıdır
Cenneti görmüş bir âdem var ise gelsin desin Tarhı anın dahi böyle dilkeş ü ranâ mıdır
Güllerinde var mı böyle reng ü bûy-ı dilfirîb Yâ nesîm-i subhu böyle bostânpîrâ mıdır
Bir dıraht-ı serfirâzı var mı bâğ-ı cennetin Yoksa ancak vâizin medh ettiği Tûbâ mıdır
Bunda Tûbâ’dan kalır mı müşk-i bîd-i sernigûn Yâ gubâr-ı berk-i Tûbâ anda müşkâsâ mıdır
Habbezâ cây-ı neşâtefzâ ki Rıdvân görse ger Hayretinden derdi bu cennet midir dünya mıdır
Sun-ı Hakk yâ gülşen-i cennetden ifrâz eylemiş Başka bir cây-ı tarabengîz ü gamfersâ mıdır
Dâimâ böyle müferrih mi bu cây-ı dilgüşâ Her zaman âb u hevâsı böyle rûhefzâ mıdır
Yoksa şimdi eyleyen âb u hevâsın terbiyet Âfitâb-ı devlet-i şâh-ı cihânârâ mıdır
Yani Sultân Ahmed-i âdil ki ferş-i dergehi Arşdan alâ değilse çarhdan ednâ mıdır
Şâh-ı dînperver ki teşrîf-i kudûmuyla zemîn Arşa nâz eylerse istiğnâsı istiğnâ mıdır
Mâh-ı mülkârâ-yı devlet ki fürûğundan felek Mihrini fark eylemez pinhân mıdır peydâ mıdır
Çarh ana tazîm edip İskender-i sânî demek Şânına nisbet meger bir medh-i müstesnâ mıdır
Belki dârât-ı Sikenderle felek bir bendesin Görse fark etmezdi İskender midir
Dârâ mıdır Atlas-ı gerdûn mu peyveste nihâl-i sidreye Yâ firâz-ı râyetinde şukka-i vâlâ mıdır
Subh-ı rûşen mi şuâ-ı mihr-i âlemtâb ile Yâ sarây-ı devletinde perde-i dîbâ mıdır Kehkeşân mıdır
felekde nesr-i tâirle yahud Tak-ı eyvânında resm-i ejder ü anka mıdır
Dest ü tabın ebr ü deryâdır diyen gâfillerin Dâimâ mazmûn-ı fikri böyle bîmanâ mıdır
Bahr eder mi kâinâtı gark-ı emvâc-ı kerem Ebr ise dâim cevâhirpâş u gevherzâ mıdır
Hem güher hem sîm ü zerdir âleme bezl ettiği Kimse bilmez keff-i desti kân mıdır deryâ mıdır
Tîga minnet çekmese rey-i cihangîri nola Mihri gör dünyâyı tutmuş tîgı hûnpâlâ mıdır
Midhat-i rey-i münîrin sebt eden fark eylemez Kendi keff-i desti mi yoksa yed-i beyzâ mıdır
Vasf-ı bûy-ı hulkı mı satr-ı hat-ı şâirde yâ Mevc-i deryâ-yı sühende anber-i sârâ mıdır
Mülk-i pür adlinde hod etmez takayyüd kârbân Hâris-i kâlâ mıdır yâ düzd-i bîpervâ mıdır
Âsumân mı âfitâb ile şitâb etmekde yâ Zîr-i rânında semend-i cüst ü çâpükpâ mıdır
Ol cihângerd-i sebükrev ki tefâvüt eylemez Zîr-i pâyında zemîn deryâ mıdır sahrâ mıdır
Berk-ı mahz iken direng etse bilinmez peykeri Rahş-ı çâpükpâ mıdır yâ kûh-ı pâbercâ mıdır
Husrevâ bu fende ger garrâlanırsam gör sözüm Lâf-ı bîmanâ mıdır yâ bir kavi davâ mıdır
Bunca demdir dava-yı sâhibkırânî eylerim Bir mübârız yok mu meydân-ı sühen tenhâ mıdır
Dürr-i nazmım çarha mengûş olsa bilmez rûzgâr Şiir-i Nefî midir ol yâ kevkeb-i Şirâ mıdır
Nûr-ı mevvâc-ı maânî mi sözümde berk uran Yâ libâs-ı nazmımın bir âteşî hârâ mıdır
Manî-i rengîn mi lafz-ı âbdârımda yahud Sâgar-ı mînâya konmuş lâlegûn sahbâ mıdır
Bikr-i manâ mı dilimde pertev-i ilhâm ile Yâ felekde âfitâb u Zühre-i zehrâ mıdır
Fikr-i pür mazmûn mudur âyîne-i tabımda yâ Aks-ı nakş-ı kârgâh-ı âlem-i bâlâ mıdır
Söz tükendi nice bir davâ-yı şiir ü şâirî Lâf-ı davâ bertaraf şimdi duâ hengâmıdır
Tâ felek kadr ü merâtib anlaya hem bildire Herkesin mikdârını ednâ mıdır alâ mıdır
Ol kadar kadri bülend olsun ki gerdûn bilmeye Arş-ı alâ mı yeri yâ kurb-i ev ednâ mıdır